حسن لغیرہ

حسن لغیرہ اس حدیث ضعیف کو کہیں گے جس کا راوی سیئی الحفظ یا مجہول ومستور یا اس کی سند متصل ہونے کے بجائے منقطع ہو، البتہ وہی روایت دوسری اور سندوں سے منقول ہو، جس سے اس کا ضعف ختم ہوجائے، اور اس کثرت سند کی بنا پر درجہ حسن کو پہنچ جائے، گویا اصلاً حدیث ضعیف ہوتی ہے ، البتہ تائیدی روایت سے وہ حسن لغیرہ بن جاتی ہے، اگروہ تائیدی روایت نہ ہوتی تو وہ حدیث ضعیف ہی رہتی ہے۔

ان چار میں سے کسی ایک کے پائے جانے پر حدیث ضعیف حسن لغیرہ قرار پاتی ہے:
(۱)…جو حدیث راوی کے سوء حفظ کی بنا پر ضعیف ہو اور اس کا کوئی متابع مل جائے وہ متابع اصل راوی سے اعلیٰ یا مساوی درجہ کا ہو۔
(۲)…جو حدیث راوی کے مجہول الحال ہونے کی بنا پر ضعیف ہو اور اس کا کوئی متابع مل جائے۔
(۳)…جو حدیث منقطع السند ہونے کی بنا پر ضعیف ہو اور اس کا کوئی متابع مل جائے۔
(۴)…جو حدیث تدلیس کی بنا پر ضعیف ہو اور محذوف راوی کا پتہ نہ چل رہا ہو اس کا کوئی متابع مل جائے۔
تو ان چاروں صورتوں میں حدیث ضعیف حسن لغیرہ اور قابل استدلال ہوتی ہے۔